Пра нас
Пра нас

Беларуская прэмія кінакрытыкаў “Чырвоны верас” адзначае найлепшыя дасягненні ў сферы беларускага кіно – кіно, якое ствараюць беларусы паводле грамадзянства альбо нацыянальнасці ў краіне і за яе межамі. Узнагароды закліканыя прыцягваць увагу да гэтых дасягненняў і спрыяць умацоўванню айчыннага кінакам’юніці. 

 

Першая эдыцыя прэміі прайшла ў 2021–2022 гадах – яе заснаванне спрычыніла брутальнае выцісканне незалежнай культуры з Беларусі, якое лукашэнкаўскі рэжым распачаў у адказ на масавыя пратэсты. Тады беларускія кінакрытыкі пастанавілі стварыць прэмію, якая б сталася гідам па беларускім кіно, пакрыла страту незалежных кінапляцовак і падтрымала высілкі беларускіх фільммэйкераў.

 

У журы “Чырвонага вераса” ўваходзяць кінакрытыкі, кінажурналісты, кіназнаўцы, даследнікі кіно, кінаблогеры. Яны ацэньваюць каротка- і поўнаметражныя ігравыя, дакументальныя ды анімацыйныя фільмы і прысуджаюць прэміі ў 13 намінацыях: “Найлепшы ігравы поўнаметражны фільм”, “Найлепшы ігравы кароткаметражны фільм”, “Найлепшы дакументальны поўнаметражны фільм”, “Найлепшы дакументальны кароткаметражны фільм”, “Найлепшы анімацыйны фільм”, «Найлепшы(ая) рэжысёр(ка)», «Найлепшы актор», «Найлепшая акторка», «Найлепшая праца аператара(кі)», «Найлепшы сцэнар», «Найлепшае мастацкае рашэнне (праца мастака(чкі)-пастаноўшчыка(цы)», «Найлепшы саўнддызайн (праца кампазітара(кі) і/ці гукарэжысёра(кі)», “Адкрыццё года”. “Чырвоны верас” разглядае стужкі, якія паўсталі ў папярэднія два гады.

каманда
Ірэна Кацяловіч
Сузаснавальніца прэміі 
“Чырвоны верас”

Беларускі кінакрытык і журналістка, сябра Міжнароднай федэрацыі кінакрытыкаў FIPRESCI, уваходзіць у журы прэміі “Залаты глобус”. Выступала ў якасці сябра журы на кінафестывалях у Беларусі, Нямеччыне, Харватыі, Польшчы. Працавала кінакрытыкам і культурніцкаю журналісткай у газеце “Звязда” і выданні “Наша Ніва”, пісала рэцэнзіі для радыё “Свабода”, была рэдактаркай і вядоўцаю праграмы пра культуру на тэлеканале “Белсат”. Сузаснавальніца Беларускай незалежнай кінаакадэміі.

Тарас Тарналіцкі
Сузаснавальнік прэміі “Чырвоны верас”

Беларускі журналіст, стваральнік тэлеграм-каналу пра беларускае кіно “Священный Белавуд”. Працуе ў медыях 15 гадоў, публікаваўся ў больш як 30 выданнях Беларусі, Украіны і Расеі. Сябра Беларускай асацыяцыі журналістаў. Уваходзіў у склад журы кінафестываляў Open air film fest, “Нефільтраванае кіно”, Velcom Smartfilm, выступаў запрошаным кінакрытыкам, экспертам і менеджарам у шэрагу кінаініцыятываў.